Inatsit tunngaviusoq

Ataani isumaginninnermut ikiorsiissutit assigiinngitsut saqqummersitami sammineqartut ikiorserneqarsinnaanermut aammalu inatsimmut tunngaviit atuarneqarsinnaapput. Annertunerusumik paasisaqarnerorusuttut Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfiup nittartagaani http://naalakkersuisut.gl – imi isumaginninnermut inatsisinik atuuttunik nalunaarutinillu atuartoqarlunilu aallertoqarsinnaavoq

 

Pisortanit ikiorsiissutit

Isumaginninnermut ikiorsiissutinik pilersuinermut, aningaasartuutinut aalajangersimasunut allanillu ikiorserneqarsinnaatitaanermi piumasaqaataavoq qinnuteqartoq Kalaallit  Nunaanni inuit allattorsimaffianni najugaqartutut allassimanissaa, aammalu

 

·       qallunaatut innuttaassuseqarnissaa

·       katissimasuunissaa imaluunniit siornatigut qallunaatut innuttaassusilimmut kateqqanikuusimanissaa, imaluunniit

·       nunat tamalaat akornanni kattuffinni isumaqatigiissutit malillugit inunnut qallunaatut inuttaassuseqanngitsunut pisortanilli ikiorsiissutinik pilersuinermut aningaasartuutinullu aalajangersimasunut Kalaallit Nunaanniinnerminni ikiorserneqarsinnaatitaanissaa

 

Pisortanit ikiorserneqarsinnaaneq taamaallaat pisarpoq ikiorsiissutit allat pisariaqartitanut naammanngippata. Pisortaniilli ikiorsiisarneq pisarpoq Inatsisartut Peqqussutaat nr. 15 20. novembari 2006-imeersoq pisortanit ikiorsiisarneq pillugu, kingornalu 1. apriili 2009-mi allannguuteqarluni atuutilersoq malillugu.

 

Suliffeqanngikkallarnermi ikiorsiissutit

Suliffeqanngikkallarnermi ikiorsiisarneq pisarpoq suliffissaaleqinermi, napparsimanermi ajutoornermiluunniit isertitaqarunnaarnermi.

 

Suliffeqanngikkallarnermi ikiorsiissutit siunertaraat angerlartitaasimasutut allattorsimasut, suliffeqanngitsut sulisinnaatitaasut aammalu napparsimasut nammineq pisuussutiginngisamik suliffeqannginnermi, angerlartitaanermi napparsimanermilu isertitaqarunnaarsimasut aningaasaqarnikkut ikiorserneqarsinnaanissaat.

 

Ikiorsiinermilu pineqartup piumasaqaatit naammassisimasassai tassaapput:

 

·       18-ileereersimanissaq imaluunniit pilersuisuunissaq

·       Kalaallit Nunaanni inunnut allattorsimaffimmi nalunaarsugaasimanissaq, aammalu

·       Qaammatini 13-ini kingullerni akissarsialittut sulisimanissaq aammalu piffissami tassani minnerpaamik akunnerit 182-it sulisimanissaq. Piffissaq suliffeqanngikkallarnermi ikiorsiissutinik pisarfiusoq sulinermi akissarsiaqarnertut naatsorsuussaanngilaq.

 

Suliffeqanngikkallarnermi ikiorsiissutit annertussusaat, ullormi siullermi suliffeqanngitsutut saaffiginninnermit agguaqatigiissillugu akunnerit sapaatip akunnerini 13-ini kingullerni akissarsialittut suliffiusimasut malillugit naatsorsorneqartarput. Ikiorsiissutillu annerpaamik sapaatip akunnerini 13-ini pisartagarineqarsinnaapput. Ikiorsiissutaasartut minnerpaamik ulluni 14-ini annerpaamillu akunnerni 40-ini isertitanut naatsorsuussaapput

 

Suliffeqanngikkallarnermi ikiorsiissutit akileraarusigassaapput, SIK-mi Naalakkersuinilu isumaqatigiissutit malillugit akit minnerpaat ilinniagaqarsimanngitsunut 90 procentiinik naleqarlutik. 

 

Suliffeqanngikkallarnermi ikiorsiissutit Inatsisartut Peqqussutaat nr. 5 1. juuni 2006-imeersoq suliffeqanngikkallarnermi ikiorsiissutit pillugit 1. juuli 2006-imi atuutilersoq malillugu tunniunneqartarput.

 

Ernereernermi ullormusiat il.il.

Ernereernermi ullormusiaqartitsineq pisarpoq ernisimalluni sulinngiffeqarnermi isertitaqarunnaarsimagaanni. Ullormusiaqarsinnaatitaaneq akissarsiaqarlutik sulisunut, namminersortunut taakkulu aapparisaannut pilersueqataasunut soorlu aalisartunut, piniartunut savaatilinnullu aammalu ilinniagaqarsimallutik naammasserlaanut ilinniarnissamullu ilinniarfinnut aalajangersimasunut qinnuteqarsimasunut atuuppoq. Ullormusiat annertussusaat ilinniagaqarsimanngitsunut akunnermut aki ilanngaatitaqanngitsoq malillugu annerpaamillu sapaatip akunneranut akunnernut 40-nut annertussusilinnut naleqqussagaavoq.

 

1.juuli 2006 aallarnerfigalugu atuutilersut tassaapput:

 

·       Naartusoq ernivissamut killigititaasumit sapaatip akunneri marluk sioqqullugit erninermi ernereernermilu sulinngiffeqalersinnaatitaasoq

·       Anaanaasoq sapaatip akunnerini 15-ini meeqqap inunngorneraniit sulinngiffeqarsinnaatitaanera aammalu aappassaanik amerlanernilluunniit meerartaaqqinnermi sapaatip akunnerini 19-ini sulinngiffeqarsinnaatitaanera

·       Ataataasup meerartaareernermit sapaatip akunnerini pingasuni sulinngiffeqarsinnaatitaanera

·       Angajoqqaajusut, ernereernermi sulinngiffeqareernerup kingorna nammineq aalajangikkamik sapaatip akunnerini 17-ini, meerartaaqqissimanermilu sapaatip akunnerini 21-ini (angajoqqaatut sulinngiffeqarnermik taasamik) sulinngiffeqarsinnaatitaaneri

 

Ernereernermi ullormusiaqartitsineq pisarpoq Inatsisartut Inatsisaat nr. 14 17. decembari 2009-meersoq naartunermi, ernereernermilu sulinngiffeqarnermi meeravissiartaarnermilu sulinngiffeqarneq ullormusiaqarnerlu pillugit inatsit malillugu. Peqqussut 1. marsi 2010-imi atuutilerpoq, peqqussummilu nutaami sulinngiffeqarsinnaanerup sivisussusaa allannguuteqanngilaq.